Amo 5 | NdeIBE | STEP | Zwana ilizwi leli, wena ndlu ka-Israyeli, isililo lesi engisenzayo ngani:

Amos 5

Isililo lesimemezelo sokuphenduka

1 Zwana ilizwi leli, wena ndlu ka-Israyeli, isililo lesi engisenzayo ngani:

2 “Iwile iNtombi u-Israyeli, kayiphindi ivuke futhi, ideliwe elizweni layo, kungekho ongayiphakamisela phezulu.”

3 Nanku okutshiwo nguJehova Wobukhosi: “Idolobho elikhuphela u-Israyeli abayinkulungwane lizasala labalikhulu kuphela; idolobho elikhupha abalikhulu lizasala labalitshumi kuphela.”

4 Nanku okutshiwo nguJehova endlini ka-Israyeli: “Dingani mina, liphile;

5 lingadingi iBhetheli, lingayi eGiligali, lingayi eBherisheba. Ngoba impela iGiligali izakuya ekuthunjweni, leBhetheli izadliwa iphele nya.”

6 Dingani uJehova liphile hlezi adabule phakathi kwendlu kaJosefa njengomlilo; uzatshisa uqothule, njalo iBhetheli kayiyikuba lomuntu ozawucitsha.

7 Lina eliguqula ukulunga kube yibuhlungu, lilahlele ubuqotho emhlabathini,

8 (yena owenza iSilimela loMthala, oguqula umnyama ube yikusa enze imini ibe yibusuku obumnyama, yena obiza amanzi olwandle, awathele phezu kobuso belizwe – uJehova yilo ibizo lakhe –

9 wehlisela incithakalo phezu kwenqaba atshabalalise idolobho elivikelweyo),

10 liyamzonda okhuzayo emthethwandaba limeyise lalowo okhuluma iqiniso.

11 Linyathezela umyanga limcindezele ukuba aliphe amabele. Ngakho-ke, lanxa lakhe izindlu ezinkulukazi zamatshe kaliyikuhlala kuzo; lanxa lihlanyele izivini ezinhle, iwayini lazo kaliyikulinatha.

12 Ngoba iziphambeko zenu ngiyazazi ukuthi zingaki kanye lokuthi izono zenu zinkulu okunganani. Licindezela abalungileyo lamukele imvalamlomo, njalo emithethwandaba linqabela abayanga imfanelo.

13 Ngakho ezikhathini ezinjalo umuntu ohlakaniphileyo uyazithulela, ngoba izikhathi zimbi.

14 Dingani okuhle, hatshi okubi, ukuze liphile. Lapho-ke uJehova uNkulunkulu uSomandla uzakuba lani njengoba lisithi ulani.

15 Zondani okubi lithande okuhle; qinisani ukulunga emithethwandaba. Mhlawumbe uJehova uNkulunkulu uSomandla uzakuba lomusa kuzinsalela zakoJosefa.

16 Ngakho nanku okutshiwo nguJehova, uJehova uNkulunkulu uSomandla, “Kuzakuba lokulila emigwaqweni yonke lokukhala kabuhlungu ezinkundleni zonke zikazulu. Abalimi bazabizwa ukuba bakhale, labakhalayo ukuba balile.

17 Kuzakuba lokulila ezivinini zonke, ngoba ngizadlula phakathi kwenu,” kutsho uJehova.

Usuku lukaJehova

18 Maye kini lina elilangazelela usuku lukaJehova! Kungani lilangazelela lolosuku lukaJehova na? Lolosuku luzakuba ngumnyama, hatshi ukukhanya.

19 Kuzafana lokuthi umuntu ubalekele isilwane wahlangana lebhere, njengangathi ungene endlini yakhe wabambelela emdulini ngesandla waselunywa yinyoka.

20 Usuku lukaJehova kaluyikuba ngumnyama na, hatshi ukukhanya – lumnyama bhuqe, kungekho nhlansi yokukhanya?

21 “Ngiyayizonda, ngiyayeyisa imikhosi yokholo lwenu; angingeke ngiyimele imibuthano yenu.

22 Lanxa lingangilethela iminikelo yokutshiswa leminikelo yamabele kangiyikuyamukela. Lanxa liletha iminikelo emihle kakhulu yobuzalwane, kangiyikuyinanza.

23 Sukani lomsindo wezingoma zenu! Kangiyikuwulalela umculo wamachacho enu.

24 Kodwa ukulunga kakugeleze njengamanzi, lobuqotho njengesifula esingatshiyo!

25 “Kanje wake wangilethela imihlatshelo leminikelo eminyakeni engamatshumi amane enkangala, wena ndlu ka-Israyeli na?

26 Seliphakamise indawo ekhonzela inkosi yenu isenabelo sezithombe zenu, inkanyezi kankulunkulu wenu – elazenzela yena lina ngokwenu.

27 Ngakho ngizalisa ekuthunjweni ngale kweDamaseko,” kutsho uJehova obizo lakhe nguNkulunkulu uSomandla.